әл-Фараби атындағы Қазақ ұлттық университетінің География және табиғатты пайдалану, Биология және биотехнология факультеттері 2025 жылдың 6–8 қарашасында «Орталық Азиядағы биоалуантүрлілікті сақтаудың мәселелері мен болашағы» атты халықаралық ғылыми-тәжірибелік конференция өткізеді.

Мемлекет басшысы 2025 жылғы 14 наурызда Бурабай қаласында өткен IV Ұлттық құрылтайда адамдардың деструктивті әрекеттері салдарынан қазіргі кезде қауіп төніп тұрған жануарлар мен өсімдіктер әлемінің биоалуантүрлілігін қорғаудың өзектілігін атап өтті. Табиғи экожүйелерді сақтау тек экологиялық мәселе ғана емес, сонымен қатар еліміздің тұрақты дамуының стратегиялық міндеті екені айтылды. Сирек кездесетін түрлердің мекендеу орындарының жойылуы, қоршаған ортаның ластануы, климаттың өзгеруі және табиғи ресурстарды шектен тыс пайдалану Қазақстанның және бүкіл Орталық Азияның бірегей табиғи мұрасына қауіп төндіреді.

Осыған байланысты ғылыми қауымдастықты бұл бастаманы қолдауға, табиғи экожүйелерді сақтау бойынша тиімді шараларды әзірлеуге белсенді қатысуға және биоәртүрлілікті қорғауға ғылыми негізделген шешімдер ұсынуға шақырамыз. Бұл міндеттердің маңыздылығы Тұрақты даму мақсаттарын (ТДМ) жүзеге асырумен тікелей байланысты, атап айтқанда ТДМ 13 – «Климаттың өзгеруіне қарсы күрес», ТДМ 14 – «Мұхиттар, теңіздер және теңіз ресурстарын сақтау» және ТДМ 15 – «Құрлықтық экожүйелерді сақтау».

Конференцияның мақсаты – Орталық Азиядағы биоәртүрлілік, Сиверс алмасын (Malus sieversii (Ledeb.) M.Roem.) сақтау, қоршаған ортаны қорғау, экотуризм және білім беру саласындағы соңғы жетістіктер туралы білім алмасу және ақпараттандыру.

Теңұйымдастырушылар: ҚР Президентінің жанындағы Ұлттық ғылым академиясы; Қазақстандағы Біріккен Ұлттар Ұйымының Даму бағдарламасы (БҰҰДБ); Германияның Федералдық қоршаған орта қоры (DBU); ЮНЕСКО-ның «Адам және биосфера» бағдарламасының Қазақстан ұлттық комитеті; «Ботаника және фитоинтродукция институты» ШЖҚ РМК; «Зоология институты» ШЖҚ РМК; «География және су қауіпсіздігі институты» АҚ; «Алматы мемлекеттік табиғи қорығы» РММ; «Қазақ ұлттық аграрлық-зерттеу университеті» КЕАҚ; «Өсімдік биологиясы және биотехнологиясы институты» ШЖҚ РМК; «Іле-Алатау ұлттық табиғи паркі» РММ; Almaty Tourism бюросы; «Jerdin Dostary» ҚБ.